ABŞ-ın Harvard Universitetinin tələbə və mübadilə proqramı sertifikatı ləğv edilib.

Parol.az xəbər verir ki, bu barədə ABŞ-ın Daxili Təhlükəsizlik Nazirliyinin məlumatında bildirilir.

Nazir Kristi Noemin imzaladığı əmrə görə, Harvard artıq xarici tələbələri qəbul edə bilməz. Mövcud əcnəbi tələbələr isə ya başqa universitetlərə köçürməli, ya da hüquqi statuslarını itirməlidirlər.

Nazirlik bu qərarı Harvard rəhbərliyinin anti-amerikan, terrorizm tərəfdarı olan təşviqatçılara bir çox yəhudi tələbələr də daxil olmaqla ayrı-ayrı şəxsləri təqib etməyə və fiziki hücuma keçməyə icazə verərək təhlükəli kampus mühiti yaratması" ilə izah edib.

"Bu təşviqatçıların çoxu əcnəbi tələbələrdir. Harvardın rəhbərliyi Uyğur soyqırımında iştirak edən Çin Kommunist Partiyasının (ÇKP) paramilitar qrupunun üzvlərinə ev sahibliyi edib. Onlara təlim keçmək də daxil olmaqla, ÇKP ilə koordinasiyalı fəaliyyət göstərib" deyə, açıqlamada qeyd olunub.

"Bu administrasiya Harvardda zorakılığı, antisemitizmi təşviq etmək və kampusunda Çin Kommunist Partiyası ilə koordinasiyalı işləməkdə məsuliyyət daşıyır " deyə, nazir Neom qeyd edib: "Universitetlərin əcnəbi tələbələri qəbul etmələri, çoxmilyardlıq ianələrini ödəmək üçün onların yüksək təhsil ödənişlərindən faydalanması hüquq deyil, imtiyazdır. Harvardın doğru yolu seçmək üçün imkanı var idi. O, imtina etdi. Onlar qanuna riayət etmədikləri üçün Tələbə və Mübadilə Proqramı sertifikatını itirdilər."

Açıqlamada xatırladılıb ki, bu ilin 16 aprelində nazir Noem Harvarddan "kampusunda əcnəbi tələbələrin cinayətkarlığı və qanunsuz davranışları haqqında" məlumat verməsini tələb edib. Həmin vaxt nazir məlumat verilməyəcəyi təqdirdə xarici tələbə qəbul etmək və mübadilə proqramı sertifikatının ləğv ediləcəyi barədə xəbərdarlıq edib.

Lakin Harvard Universiteti tələb olunan məlumatı verməkdən imtina edib.

Daxili Təhlükəsizlik Nazirliyinə görə, " Harvardın kampusunda zəhərli iqlim hökm sürüb".

Nazirlik qeyd edib ki, birgə hökumət işçi qrupu Harvardın kampusunda "geniş yayılmış irqi ayrı-seçkilik və antisemitizm təqibləri" ilə mübarizə apara bilmədiyini müəyyən edib .

"Belə ki, kampusdakı yəhudi tələbələr geniş yayılmış təhqirlərə, fiziki hücumlara və hədələrə məruz qalıblar. Məsələn, kampusda bir yəhudi tələbənin hücumunda rol aldığı üçün ittiham olunan etirazçı Harvard İlahiyyat Məktəbi tərəfindən başlanğıc üçün Sinif Marşalı seçilib. Harvardın 2025-ci ildə antisemitizmlə bağlı daxili araşdırması göstərdi ki, yəhudi tələbələrin 60%-i “cari hadisələrə baxışlarına görə kampusda ayrı-seçkilik, stereotiplər və ya mənfi qərəzlilik” yaşadıqlarını bildiriblər".

Nazirlik yazıb: "Bir halda, konfransda yəhudi tələbə məruzəçi Holokostdan sağ çıxan babasının İsraildə sığınacaq tapmasının hekayəsini danışmağı planlaşdırıb. Təşkilatçılar tələbəyə hekayənin “mənalı" olmadığını söyləyiblər, çaşqınlığını ifadə edəndə isə ona gülüblər . Onlar hekayənin zülmə haqq qazandıracağını deyiblər.
Bu arada, 7 oktyabr hücumlarından sonra antisemitizmi təbliğ edən HƏMAS tərəfdarı tələbə qrupları tanınıb və maliyyələşdirilib" .

"Harvard tələbələrini qorumaq əvəzinə, cinayət nisbətlərinin artmasına, irqçi praktikalarının tətbiqinə, xarici hökumətlərdən və donorlardan çoxlu nağd pul qəbul etməsinə icazə verib.

Harvardda cinayət nisbətləri 2022-ci ildən 2023-cü ilə qədər 55% artıb .

2022-ci ildən 2023-cü ilə qədər ağır cinayətlər 295%, soyğunçuluqlar isə 560% artıb.

Harvard irqi şüurlu işə götürmə siyasətini qəbul edib, bu da potensial olaraq mülki hüquqlar qanununu pozur.

Harvard 2020-ci ilin yanvar ayından etibarən xarici hökumətlərdən 151 milyon dollar alıb. Eyni dövrdə xarici donorlardan alınan ümumi 1,1 milyard dolların 13 faizindən çoxunu təşkil edir" deyə, nazirlik qeyd edib .

Daxili Təhlükəsizlik Nazirliyi Harvardı "ABŞ Xəzinədarlığının xüsusi təyin olunmuş vətəndaşlar siyahısına 2020-ci ildə daxil edilməsindən sonra belə, Uyğur soyqırımında iştirak edən Çin Kommunist Partiyasının yarımhərbi qruplaşması olan Sincan İstehsalat və Tikinti Korpusunun (XPCC) üzvlərinə ev sahibliyi edib, onlara təlim keçməkdə" ittiham edib: "Harvard tədqiqatçıları İran hökumət agenti tərəfindən maliyyələşdirilən layihələrdə Çində fəaliyyət göstərən alimlərlə əməkdaşlıq ediblər və ABŞ Müdafiə Nazirliyinin vəsaitlərindən istifadə edərək, hərbi nailiyyətlər, o cümlədən aerokosmik və optika tədqiqatlarla bağlı Çin universitetləri ilə əməkdaşlıq ediblər. Harvard Çinin müdafiə-sənaye bazası ilə əlaqəli şəxslərlə , o cümlədən hərbi tətbiqlərlə robototexnika tədqiqatları aparmaqla əməkdaşlıq edib".

Harvard Universiteti isə hökumətin qərarının qanunsuz olduğunu bildirib.

"Universitet 140-dan çox ölkədən olan beynəlxalq tələbə və tədqiqatçıları qəbul etmək öhdəliyini qoruyur. Bu cəza xarakterli addım həm Harvard icmasına, həm də ölkəyə ciddi zərər verə bilər. Eyni zamanda, bu qərar universitetin əsas akademik və tədqiqat missiyasını zəiflədə bilər" deyə Harvardın açıqlamasında qeyd olunub.